Sopot со бесплатен сингл како најава за третиот албум
Напишано од Новости
Како најава за третиот албум, најпознатиот бенд од Бања Лука (БиХ), Sopot, на своите фанови им го подарува својот нов сингл „Kosmos“. Автентичниот звук кој го создава овој бенд претставува хибриден спој на даб и балкански фолклор со примеси на реге, drum n bass, дабстеп итн.
Од бендот најавуваат дека наскоро треба да биде снимен и спот за синглот, а целосниот албум, со работно име „Sopotnik“, се очекува да излезе кон крајот на оваа година.
Името „Sopot“ е добиено од старословенскиот јазик и значи „извор“. Бендот е формиран во 2006 год., а поставата ја сочинуваат Petar Topalović (вокал), Ðurica Štula (бас гитара), Saša Predojević (тапани) и Milan Aćimović (клавијатура, ефекти и придружни вокали). Стилот на пеење на вокалот е добиен под влијание на духовната музика на византиското христијанство.
На првите два албума, „DuBalkan“ и „Equilibrium“ гостуваат светски познати даб уметници како L’ouf Raide, Nico Matagrin, R-Zatz, Dr. Das, Uzul Prod, Aku Fen и др. На своите настапи низ Европа и Балканот бината ја имаат делено со изведувачи како Dr. Das (UK), Prince Alla (Jamajka), Visionary Underground (UK), UK Subs (UK), Watcha Clan (FR), Terracota (Portugal), Filastine (USA), Kultur Shock (USA), High-Tone (FR), Hornsman Coyote (SRB)…
Слушнете го синглот „Коsmos“: